Kuo tauhi ‘e he kau polisi ‘a Patelesio Mafi ta’u 66 ‘o Ma’ofanga ‘i ha mahina ‘e taha ‘o tali ai ke hilifaki ‘a hono tautea hili ‘eni ha’ane halaia ki ha’ane ‘ohofi mo fakalavea'i ha taha ‘oku ne foha’aki ko Richard Mafi ta’u 39 ‘i ha fale ma pe ‘o e famili Mafi ‘i Ha’amoko ‘i he 2011.
Na’e loto taha ‘a e kau sula ke halaia ‘a Patelesio ‘i he ho’ata Falaite 28 ‘o Ma’asi ki he hia ko ‘ene fakatupu ha fakalavea lahi ’i he’ene ta helepelu’i ‘a Richard lolotonga ha ta’e femahino’aki ‘i Fepueli ‘aho 15 ‘o e 2011 ‘i he fale maa pe ‘i Ma’ufanga.
Na’e fakaha ki he fakamaau’anga na’e angamaheni pe ke vahe’i ange ‘e Sepa Mafi kuo ne malolo, ko e tamai ia 'a Richard ka ko e tokoua 'o Patelesio ha vahe ‘a hono fanga tokoua ‘o kau ai ‘a Patelesio taki pa’anga ‘e $300 he uike.
‘I Fepueli ‘o e 2011 ne fakamo’ua ai ‘e he taha e fanau ‘a Patelesio ha’ane me’atokoni ‘i he Fale Ma ‘i Ha’amoko.
‘I he’ene a’u ki he ‘aho vahe na’e to’o ‘e Richard ia ‘a e mo’ua ko ‘eni mei he vahe ‘a Patelesio.
Na’e ha’u heni ‘a Patelesio ‘o ’eke kia Richard pe ko e ha ‘a e silini ko ‘eni ne to’o mei he’ene vahe.
‘I hono fakamatala atu ‘e Richard ‘a hono ‘uhinga na’e kaila atu ai ‘a Patelesio te ne taa’i ia.
Na’a ne a’u hake ai ki he’ene me’alele ‘o to’o mai ha helepelu ‘o ne ‘ohofi’aki ‘a Richard.
Na’a ne taa’i ‘aki ai e hele ‘a Richard ‘i hono sino ‘o tau e ta ‘e taha ‘i hono ‘ulu ‘o ne to ai ki lalo kae fa noa e toto.
Na’e leleaki’i ‘a Richard ki Fale Mahaki pea ne toki ‘ata ‘i ha ngaahi ‘aho.
Hili hono fakaha e tu’utu’uni ‘a e kau sula na’e tu’utu’uni ‘e Fakamaau Charles Cato ke tauhi ‘e he kau polisi ‘a Patelesio kae ‘oua leva kuo hilifaki ‘a hono tautea ‘i ‘Epeleli ‘aho 24 ‘i he fakamaau’anga Polisi Nuku’alofa.
Na'e fakafofonga'i fakalao 'a e Pule'anga 'e Joan Puloka pea 'Ofa Pouono ma'a e faka'iloa.